Lëvizja Vetëvendosje ka kërkuar që në ekipin negociator të Kosovës në bisedimet me Serbinë të ketë edhe përfaqësues të Luginës së Preshevës.

Deputeti i Lëvizjes Vetëvendosje, Liburn Aliu në një konference për media ka kërkuar që ekipi negociator të ketë edhe një përfaqësues të Luginës të Preshevës.

Aliu ka thënë se është i pakuptimit fakti që presidenti Hashim Thaçi e përmend Luginën, mirëpo në ekipin negociator nuk ka përfaqësues nga kjo pjesë.

“Në draft dokumentin e Qeverisë së Kosovës për dialog me Serbinë nuk figuron fjala reciprocitet. Ekipi negociator që do udhëtoj nesër në Bruksel po shkojnë vetëm që të vazhdojnë ketë proces që nuk i solli asgjë të mirë Kosovës. Si është e mundur që pikërisht në këtë delegacion ku ka përfaqësues të partive aq të vogla të mos ketë edhe përfaqësues të Luginës”, tha Aliu, duke shtuar se, nuk mjafton vetëm përfshirja e temës se Luginës por duhet të ketë edhe përfaqësues të kësaj pjese.

Aliu vlerëson se ekipi negociator për bisedime me Serbinë është i mangët dhe po shkon në bisedime pa një platformë të qartë.