Thaçi përdor fuqinë e Presidentit, bllokon emërimet për ambasadorë të koalicionit Haradinaj

Presidenti Hashim Thaçi dhe kryeministri Ramush Haradinaj, përveç se janë në linja krejtësisht të kundërta sa i përket dialogut me Serbinë, dhe ideve se si duhet të procedohet rreth zgjidhjes finale, jo vetëm se kanë filluar një përballje me deklarata kundër njëri – tjetrit, por edhe duke e përdorur fuqinë që ua japin pozitat e tyre institucionale.

Loading...

Gazeta Metro, mëson se presidenti Hashim Thaçi, duke përdorur pozitën e tij institucionale, ka vendosur të mos jap nënshkrimin e tij për asnjë nga propozimet për ambasadorë të propozuar nga koalicioni qeverisës.

Thaçi me këtë është duke i treguar koalicionit qeverisës, e në veçanti kryeministrit Haradinaj, se kjo qeveri është e varur nga fuqia e tij politike, jo vetëm përmes disa deputetëve që i kontrollon në Kuvendin e Kosovës, por nga fuqia e tij direkte që ja ofron roli i tij si president i vendit.

Siç edhe dihet, jo zyrtarisht, emërimi i ambasadorëve të Kosovës, ndahet në bazë të marrëveshjeve politike të subjekteve të përfaqësuara në koalicionin qeverisës, njëjtë, pak a shumë sikurse ndarja e pozitave nëpër ministri apo borde.

Mirëpo, te ambasadorët, përveç pajtimit në mes të partnerëve të koalicionit, duhet edhe aprovimi i Presidentit, dhe në këtë pikë Thaçi është duke e përdorur fuqinë e tij.

‘Konflikti’ Thaçi – Haradinaj, tashmë i shfaqur edhe në publik, përmes deklaratave të të dy krerëve të shtetit, tregon se kjo qeveri mund të mos ketë jetë të gjatë, dhe të ketë fatin e qeverive paraprake, duke u rrëzuar para përfundimit të mandatit legal.

Ajo që po deklarohet jozyrtarisht në qarqet brenda koalicionit qeverisës, vendi pritet të shkojë në zgjedhje të parakohshme më së largu në pranverën e vitit të ardhshëm. /gazetametro.net