Tahiri: Vetëvendosje dhe Lista Serbe po i pengojnë reformat në drejtësi

Ministri i Drejtësisë, Abelard Tahiri, ka kundërshtuar pohimin e Lëvizjes Vetëvendosje se institucionet e sundimit të ligjit janë përgjegjëse për mos liberalizimin e vizave.

Ai ka thënë se “është e pa pranueshme që kundërshtarët më të mëdhenj të lëvizjes së lirë përmes konferencave për shtyp të glorifikojnë qëndrimet e tyre si alternativë, përkundër faktit se në përditshmëri refuzojnë të kontribuojnë në konsolidimin e shtetit të së drejtës”.

Loading...

“Për informimin korrekt të qytetarëve të Republikës së Kosovës, ju rikujtojmë se për 14 muaj me radhë janë ndërmarrë reforma të thella në drejtësi, përfshirë transformimin e politikës penale në drejtim të fuqizimit të sundimit të ligjit si dhe luftës kundër korrupsionit, krimit të organizuar, fuqizimin e gjyqësorit, të drejtave pronësore, kodifikimit të së drejtës civile si dhe përmbushjes së Agjendës së Reformave Evropiane”, ka shkruar Tahiri në Facebook.

Ministri ka deklaruar se “këto reforma kanë ndikuar drejtpërdrejtë në vlerësimin pozitiv nga ana e Komisionit Evropian për përmbushjen e kritereve si dhe rekomandimin për liberalizimin e vizave për qytetarët e Republikës së Kosovës”.

Sipas tij, janë dy subjekte politike që i kanë kundërshtuar në vazhdimësi këto reforma, konkretisht Lëvizja Vetëvendosje dhe Lista Serbe.

“Këto dy subjekte politike përmes abuzimit me mandatet që kanë duke shfaqur papërgjegjësi të plotë në mbështetje të këtyre reformave, çdo ditë i kanë kontribuar dhe i kontribuojnë skeptikëve të lëvizjes së lirë të qytetarëve të Republikës së Kosovës”, ka thënë Tahiri.

“Megjithatë, jam i bindur se krahas përmbushjes së secilit obligim të Republikës së Kosovës për procesin e liberalizimit të vizave, vendet e Bashkimit Evropian do të njohin kredencialet e përpjekjeve tona institucionale dhe shoqërore, në mënyrë që qytetarët e Kosovës të lëvizin lirshëm brenda Zonës Shengen, si e drejtë e pa alternativë”, është shprehur ai.