Qeveria s’e ka ndërmend ta ndalë luksin as vitin e ardhshëm

Vetëm 100 milionë euro më shumë se buxheti i 2018-ës janë në buxhetin e 2019-ës nga të hyrat e brendshme.

Pjesa tjetër e buxhetit prej 2 miliardë e 370 milionë eurosh, do të mbulohet nga fondet e likuidimit dhe emetimit të letrave me vlerë, raporton KTV.

Loading...

Por, sipas analistit financiar, Hekuran Murati, shuma e përgjithshme e buxhetit është arritur nga mosshfrytëzimi i mjeteve që ishin ndarë për vitin 2017.

Kurse, rritja e të hyrave nga ATK-ja dhe ulja e të hyrave nga dogana, thonë se është shenjë e mirë për zhvillimin ekonomik.

E, përveç rritjes së shpenzimeve për paga, ashtu siç është vepruar viteve të kaluara, pjesa më e madhe e buxhetit do të jetë e destinuar në mallra dhe shërbime.

Madje, për këtë kategori buxheti është rritur për 71 milionë euro.

Sipas zyrtarëve të Ministrisë së Financave, në rritjen e shpenzimeve të kësaj kategorie nuk ka ndikuar rritja e numrit të punëtorëve.

Luksi për vetura e orendi prapë nuk do të ndalet, pasi mijëra euro do të shkojnë për këtë kategori.

Madje, 300 mijë euro janë ndarë për blerje të veturave për të gjitha ambasadat, 100 mijë të tjera për MPJ-në, 81 mijë për UP-në, e 24 mijë për Gjakovën.

E, sërish do të ketë investime në ndryshimin e enterierit në disa institucione.

Për zonat ekonomike, për të cilat u vlerësua se nuk do ketë ndikim ekonomik, Qeveria ka ndarë hiç më pak se 2 milionë e 400 mijë euro.

Një shpenzim i buxhetit prej miliona eurosh do të shkojë për mirëmbajtjen e autostradave dhe rrugëve rajonale.

Madje, autostrada Morinë-Merdare, e cila ishte pre e vjedhjeve të shumta, pritet edhe të ndriçohet me 700 mijë euro.
Ligji për Prishtinën dhe ai për Obiliqin do t’i konsumojnë buxhetit të shtetit gjithsej 15 milionë euro.