Nxënësit nga Lugina e Preshevës vizitojnë Prekazin (FOTO)

Nxënësit e shkollave të mesme të Preshevës, Medvegjës dhe Bujanocit kanë vizituar sot kompleksin memorial “Adem Jashari” në Prekaz.

Loading...

Këtë eskurzion e ka organizuar zyra e Koordinatorit Nacional për Kulturë, Rini dhe Sport, me ç’rast kanë marrë pjesë rreth 115 nxënës, njofton Klan Kosova.

Aty i ka pritur koordinatori nacional për Kulturë, Rini dhe Sport, Rexhep Hoti, i cili i ka njoftuar fëmijët për historinë dhe ngjarjet e zhvilluara gjatë luftës së vitit 1998-99 me Serbinë.

Nxënësit kanë pasur rastin ta vizitojnë edhe muzeun e familjes Jashari, me ç’rast kanë mbajtur një minutë heshtje për dëshmorët e rënë.

Ata u shprehën të lumtur për Klan Kosova, që iu ka dhënë rasti të familjarizohen edhe më tepër me familjen heroike të Kosovës.

Ndërsa koordinatori Hoti, ka thënë se herën tjetër do t’u mundësoj nxënësve të shkollave fillore nga komunat e Preshevës, Medvegjës dhe Bujanocit që ta vizitojnë Kosovën.

Këta nxënës, në mesditë do ta vizitojnë edhe Qeverinë e Kosovës, ku do të priten nga Kryeministri i Kosovës, Ramush Haradinaj.