Kosova shënon ngritjen më të lartë ndonjëherë në renditjen e FIFA-s

Kosova e ka shënuar rritjen më të lartë deri më sot në renditjen zyrtare të FIFA-s, duke u renditur e 131-ta, për gjashtë pozita më lartë, falë suksesit të treguar në Ligën e Kombeve.

Në listën e publikuar sot, Dardanët janë vlerësuar me 1113, ndërsa në listën e kaluar ishin vlerësuar me 1099 pikë, shkruan Gazeta Express.

Loading...

Kjo ngritje e skuadrës së Bernard Challandes vjen pas fitoreve që shënoi Kosova gjatë ndeshjeve të zhvilluara në nëntor në kuadër të garës inauguruese të UEFA-s, Ligës së Kombeve.

Në ndeshjen e parë të zhvilluar këtë muaj, Dardanët udhëtuan në Maltë, ku e siguruan fitoren me rezultat 5-0, përmes golave të shënuar nga Vedat Muriqi, Donis Avdijaj, Benjamin Kololli dhe Milot Rashica.

Ndeshja e dytë kishte edhe më shumë rëndësi për Kosovën pasi që fitorja ose barazimi do t’ia siguronte një vend në play-offs për kualifikim në Kampionatin Evropian si dhe promovim nga Liga D në Ligën C.

Në këtë ndeshje kaq të rëndësishme, Kosova arriti ta mposhtë Azerbajxhanin me rezultat 4-0 ne stadiumin “Fadil Vokrri”, duke e arritur suksesin më të madh të Kombëtares deri më tani, përmes het-trikut të Alban Zenelit dhe golit të Amir Rrahmanit.

Këto dy fitore kanë bërë që Kosova të ngritët në pozitën më të lartë ndonjëherë në këtë radhitje të FIFA-s, gjë e cila është theksuar edhe nga faqja zyrtare e këtij organi qeverisës të futbollit.

Kosova ka treguar formë të mirë tash e një vit pasi që për herë të fundit ka pësuar disfatë më 9 tetor të vitit 2017, kur trajner i Kombëtares së Kosovës ishte ende Albert Bunjaki.

Në gjashtë ndeshjet e zhvilluara në Ligën e Kombeve, Dardanët i siguruan katër fitore dhe dy barazime. Në këtë garë, Dardanët e kanë pasur sulmin më të suksesshëm, duke i shënuar plot 15 gola dhe duke i pranuar vetëm dy.

Lista e radhës do të publikohet më 20 dhjetor. /Gazeta Express/