Ka arritur në 85 numri i personave të helmuar nga ushqimi i cili u servua ditë më parë në njërën nga gjellëtoret në Komunën e Drenasit.

Personat ishin helmuar pas ushqimit që kishin marrë për iftar ditën e premte (17 maj), një pjesë e personave të helmuar janë të shtirë në Spitalin e Drenasit, dhe një pjesë e tyre janë dukë marrë trajtimin e duhur në QKUK-Prishtinë.

Zëdhënësi i Komunës së Drenasit, Bekim Dobra, në një deklaratë të dhënë për Telegrafin ka thënë se kanë reaguar menjëherë sapo kanë marrë informatat se ka persona të helmuar.

“Komuna e Drenasit pas njoftimit që ka marrë nga Shtëpia e Shëndetit se ka një rast të helmimit në ushqim e ku janë raportuar 14 raste, 4 prej tyre janë të hospitalizuar dhe 10 në gjendje stabile ka reaguar. Ne kemi lajmëruar Agjencinë e Ushqimit që të i verifikojnë mostrat e të analizojnë ushqimin dhe prejardhjen e këtij ushqimi. Numri i personave të helmuar ka arritur në 85”, tregoi Dobra për Telegrafin.

Tutje Dobra tha se lokali do të jetë i mbyllur deri sa të dalin rezultatet nga Agjencioni i Ushqimit.

“Inspektorati komunal për shkaqe të sigurisë së përgjithshme të shëndetit, ka marrë aktvendim për mbylljen e përkohshme të lokalit, në të cilën dyshohet se ka ardhë helmimi deri në rezultatet e dhënë nga Agjencioni i Ushqimit, në rast se vërtetohet se helmimi ka rrjedhë si pasojë e ushqimit të këtij lokali, Komuna, drejtoria e Inspektoratit do t’i marrë masat e nevojshme”, tha ai për Telegrafin.

Dobra tha së kanë vizituar disa familje që janë helmuar, ai tha se një familje në fshatin Terstenik ka qenë komplet e helmuar.

Ndërkohë nga Policia e Kosovës kanë bërë të ditur se pronari i lokalit është intervistuar por që më pas është liruar në procedurë të rregullt.

“Me datën 17.05.2019 e kemi pranuar një informatë, se në një lokal ne Drenas, dyshohet të jenë helmuar nga ushqimi disa persona. Informata është trajtuar nga ana e policisë në bashkëpunim me Prokurorinë dhe institucionet përkatëse.

Lidhur me këtë ngjarje më 18 maj 2019 me urdhër të Prokurorit është iniciuar rasti shkaktim i rrezikut të përgjithshëm”, ka konfirmuar zëdhënësja e Policisë së Kosovës, Flora Ahmeti për Telegrafin.

Aktualisht mostrat e ushqimit të gjetura në kuzhinën e lokalit, janë në laboratorë duke u testuar nga Agjencia e Ushqimit dhe Veterinarisë./Telegrafi/