Edhe 4 vota për ta rrëzuar Qeverinë

Partitë opozitare në çdo prononcim për media janë deklaruar se janë gati të japin votat për ta rrëzuar Qeverinë e Haradinajt, mirëpo duket se nuk i kanë numrat.

Loading...

Ka qenë deputetja e Lëvizjes Vetëvendosje, Albulena Haxhiu, ajo që ka konfirmuar se opozita po ‘çalon’ në sigurimin e votave për ta votuar ndonjë mocion eventual për rrëzim të Qeverisë, shkruan gazetametro.net.

“Në këtë drejtim ne konsiderojmë se duhet të kemi qasje serioze dhe të kemi 61 votat. Votat e Vetëvendosjes, 19 prej tyre janë të gjitha, ato i kemi të gatshme. Vetëm duhet të sigurohemi që i kemi edhe 4 apo 5 sa na duhen”, ka thënë Haxhiu sot në Kuvend.

Mirëpo, partitë e tjera opozitare nuk kanë folur me numra akoma. Ata janë shprehur gati për ta rrëzuar Qeverinë, por asnjë nga opozitarët nuk e ka dhënë nënshkrimin për të nisur procedurat.

Sidoqoftë, partitë opozitare kanë mjaft deputetë, por jo mjaftueshëm për mocion mosbesimi. Lidhja Demokratike e Kosovës ka 23 deputetë, Lëvizja Vetëvendosje 19, Partia Socialdemokrate 12 si dhe 3 të pavarura, që nënkupton se janë 57 vota opozitare.

Sipas ligjit, për t’u votuar një mocion mosbesimi ndaj Qeverisë nevojitet një shumicë e thjeshtë parlamentare prej 61 deputetësh, që nënkupton se opozita duhet të kërkojë edhe 4 deputetë të gatshëm për ta rrëzuar Qeverinë.

Ndryshe, Qeveria Haradinaj ishte krijuar me numra minimal, mirëpo ka arritur të mbijetojë nga mungesa e votave të opozitës për të inicuar ndonjë mocion për rrëzim të Qeverisë.