“Finalja e madhe” po afron.

Skuadra e Feronikelit e pret Prishtinën të dielën me fillim nga ora 16:00 në stadiumin ‘Rexhep Rexhepi’, në kuadër të xhiros së fundit të Ipko Superligës së Kosovës, përcjell GazetaBlic.

Feronikeli është lideri i kampionatit me 77 pikë, kurse Prishtina pozicionohet në vendin e dytë me 75 pikë. Klubi i Zekrija Ramadanit, Feronikeli mund ta fitojë titullin me fitore ose barazim, ndërsa Prishtinës i duhet vetëm fitorja që të rikthehet me kupë në kryeqytet.

Zyrtarë nga klubi i Feronikelit kanë konfirmuar se ende nuk e kanë të qartë nëse do të lejohen dy tifozeritë në stadium, pasi ky impiant nuk i plotëson kushtet.

I menjëhershëm ka qenë reagimi i kryetarit të ‘Plisave’, Albert Kastrati, i cili tha se e tërë Prishtina do të jetë në Drenas të dielën.

“E gjithë Prishtina do të jetë në Drenas, ka ardhur koha për titull dhe ne jemi gati të festojmë”, ka thënë Kastrati për ‘GazetaBlic’.