Në Mitrovicë PDK nënshkruan koalicion me këtë parti

Valdete Idrizi e PDK’së do ta ketë përkrahjen e AAK’së për balotazh në Mitrovicë pas një marrëveshje të arritur mes dy partive.

Pas diskutimit dhe pajtimit për koalicion, në mes të degës së Partisë Demokratike të Kosovës dhe degës së Aleancës për Ardhmërinë e Kosovës, është nënshkruar koalicioni për zgjedhjet lokale në Mitrovicë që mbahen më 19 Nëntor, thuhet në komunikatën e degës së PDK’së.

“Marrëveshja e sotme për zgjedhjet lokale, e nënshkruar për koalicion me AAK-në, është rikonfirmim i ndryshimit që tashmë është duke ndodhur, për Mitrovicën ndryshe, për më shumë investime, më shumë vende pune e mundësi punësimi, më shumë cilësi në arsim, shëndetësi dhe jetë më të mirë të qytetarëve të Mitrovicës në mandatin e ardhshëm”, ka theksuar Valdete Idrizi, kandidate e PDK-së për kreun e komunës.

Marrëveshjen e koalicionit për zgjedhje lokale në Mitrovicë, e ka nënshkruar  Avni Kastrati, kryetari i degës së PDK-së dhe kandidatja e kësaj parti për kryetare të komunës, Valdete Idrizi, ndërsa nga ana e AAK-së, marrëveshjen e  nënshkroi kryetari i degës, Esat Peci.

Idrizi garon në rrethin e dytë kundër Agim Bahtirit të AKR’së, ndërsa balotazhi mbahet më 19 nëntor.