Kryetari Bahtiri dënon incidentet e fundit, kërkon vazhdimin e punëve përreth urës

Kryetari i Komunës, Agim Bahtiri e dënon ashpër incidentin që ka ndodhur gjatë natës së mbrëmshme, si dhe disa incidente ndëretnike të ditëve të fundit, që kanë ndodhur në të dyja pjesët e qytetit e Mitrovicës, ku viktima kanë qenë, si serbët, ashtu edhe shqiptarët.

“Incidentet ndëretnike të ditëve të fundit, pavarësisht cilat janë motivet e tyre, janë të pa pranueshme, andaj edhe i dënoj ashpër dhe kërkoj reagimin sa më të shpejtë të organeve të hetuesisë, me qëllim që të zbulohen shkaktarët dhe të vendosen para organeve të drejtësisë, për të marrë dënimin e merituar, sepse vetëm në këtë mënyrë mund të ndërpriten ato”, thotë kryetari Bahtiri.

Sipas tij, këto incidente që po ndodhin në kohën kur në qytetin e Mitrovicës situata e përgjithshme është e qetë, kur përmirësimi i marrëdhënieve ndëretnike është duke shkuar mirë, kur lëvizja dhe qarkullimi i njerëzve dhe automjeteve po zhvillohet pa probleme në të dyja anët e lumit Ibër, kur punimet për rivitalizimin e urës po vazhdojnë pa pengesa.

“Si duket, këto të arritura që janë meritë para së gjithash e vet qytetarëve, të të gjitha komuniteteve, nuk po ju pëlqejnë atyre që nuk ia duan të mirën qytetit të Mitrovicës e as qytetarëve të saj , andaj edhe duke i nxitur incidentet ndëretnike, po mundohen që të zhvlerësojnë të gjitha të arriturat në këtë drejtim dhe të krijojnë tensione e pasiguri tek qytetarët, gjë që është e pa pranueshme. Por, unë besoj se një gjë të tillë nuk do ta lejojnë vet shqiptarët, serbët, boshnjakët, romët, ashkalitë e pjesëtarët e komuniteteve tjera që jetojnë në të dyja e komunat e Mitrovicës, që janë të njohur pë kultivimin e marrëdhënieve të mira ndëretnike e ndërnjerëzore”, thotë kryetari Bahtiri.

Në vazhdim kryetari Bahtiri apelon tek qytetarët e të gjitha përkatësive etnike që të vazhdojnë rrugën e komunikimit, bashkëpunimit dhe luftimit të të gjitha përpjekjeve që kanë për qëllim dëmtimin e interesave të përbashkëta.

“Po ashtu, janë të papranueshme dhe tendencioze përpjkejet e personave apo grupeve të ndryshme për politizimin e incidenteve, përderisa organet e hetuesisë, rendit e sigurisë, nuk i ndriçojnë motivet e tyre. Në vend që te mundohen t’i politizojnë këto incidente, është më mirë ,më njerëzore dhe më efikase e frytdhënëse që këta persona apo grupe, të angazhohen për të dhënë kontributin e tyre për ruajtjen e të arriturave të lartpërmendura dhe për një të ardhme më të mirë të të gjitha komuniteteve”, thekson kryetari Bahtiri.

Dhe krejt në fund, kryetari Bahtiri vlerëson se është e pa nevojshme, e papranueshme dhe madje e dëmshme ftesa për ndërprerjen e punimeve për rivitalizimin e urës kryesore mbi Ibër. Përkundrazi, shton ai, intensifikimi i punëve dhe inaugurimi në afatin e paraparë të urës, do të ndikoj në relaksimin e mëtutjeshëm të gjendjes dhe raporteve ndërmjet qytetarëve të të dyja komunave të Mitrovicës.

 
Loading...