Kjo është historia e fshatit Abri të Drenicës, si u krijua ky fshat dhe si e mori këtë emër

///Shkruan: Hamdi Kurti ///

Nëse e marrim etimologjinë reale të emrit Abri , duhet doemos të shkruhet OBRI , sepse emri i të parit tonë është OBRI .

Thuhet , sipas gojëdhënave se të parët tanë , të shtërnguar nga nevoja e moszhdukjes fizike e biologjike , ikën nga Mirdita , për të mbijetuar që të mos zhdukeshin fizikisht nga ekspeditat turke dhe u vendosën në Malësinë e Podgurit .

Ishin të krishterë – katolikë dhe aty gjetën kishën dhe kushte që të mbijetonin , por ajo kishë ishte ortodokse dhe kryekëput nën ndikimin hegjemonist sllav dhe poashtu armiqësor sikurse ai pushtuesi turk dhe grek .
Dalëngadalë , nga politika sllave , këta të ikur apo të dyndur filluan të humbin identitetin e tyre kombëtar .
Dikush thotë se emri OBËR është me prejardhje ilire .

Shkencërisht nuk e di .

Nuk ngul këmbë në këtë .

Të parët tanë ishin fis BERISHË , por unë ende nuk e di se si janë ndarë BERISHA E KUQE apo fisi KUQ dhe BERISHA E BARDHË .

Thuhet gjithashtu se aty , nën ndikimin sllav të politikës së kohës , u asimiluan plotësisht shumë shqiptarë , refugjatë të ikur nga ekspeditat shfarosëse turke dhe u bënë plotësisht SLLAVË .

Vetë MARK MILANI ishte i po atij fisi që më vonë u bë një antishqiptar i devotshëm ( nga fisi i KUQIT ) .

Nuk e di sa është e vërtetë , por thuhet se edhe Petar Petroviq Njegoshi ishte i fisit KUQ .

Nga Podguri , një familje shqiptare , mori rrugën e shtegtimit sërish dhe kur vijnë në Kosovë , ndalen dhe pushojnë në një vend .

Ishin tre vëllezër :

PREKA

OBRI

dhe

LUTA .

Vëllai i vogël , LUTA , u ndal në DUkagjin , pikërisht në vendin e sotëm ku quhet LUTOGLLAVË , ndërsa dy vëllezërit tjerë shtegtojnë më tej .

Sot , në LUTOGLLAVË dhe në TURJAKË ka fis të KUQIT .
Shtegtimi i dy vëllezërve tjerë , Obrit dhe Prekës vazhdoi deri në Drenicë .

U vendosën në fshatin Verbovc të sotëm ( tashmë me riemërtim – FORTESË ) dhe aty gjetën ujë , tokë pjellore , pyll dhe një vend për mbijetesë .

Vërbovci ( tashmë FORTESA ) , në të kaluarën e lashtë kishte qenë qytet dhe kishte pasë kala dhe rreth saj një KAZA .

Mbase u janë frikësuar ekspeditave turke edhe aty , edhe pse ishte aty toka tejet pjellore , pylli afër , shumë rrjedha uji mbitokësore , pas një kohe ndahen OBRI dhe PREKA .
OBRI vendoset në Abrinë e sotme , ndërsa PREKA vendoset në PREKAZ .

. . . . . . . . . . . . . . . . . . . . . . . . . . . . . . .

Obri në atë vendbanim që vendoset gjen Bytyqin që ishte i vendosur më heret dhe Gashin që kishte ardhë nga Llausha e Skenderajit .

Ata ishin me besim musliman , ndërsa OBRI ishte i besimit katolik , por pas disa vitesh edhe familja e OBRIT kthehet në besimin musliman dhe djalin e dytë e pagëzon me emrin ISLAM , ndërkohë që djalin e madh e kishte të pagëzuar me emrin GAXHË dhe unë nuk e di se nga cili besim është pagëzuar GAXHA .

OBRI ka pasë pesë djem

– GAXHA

– ISLAMI

– REXHA

– ÇERKINI dhe

– SMAKA .

Sot , nga këto trungje familjare të OBRIT është edhe thënia :

PESË BARQET E ABRISË

– nga pesë trungjet e para të OBRIT .

Pas një kohe që janë vendosë në Abri , bijtë e OBRIT janë nda dhe tre prej tyre kanë mbetë në Abrinë e Epërme ( të sotme , që është nën administratën e komunës së Drenasit ) , ndërsa dy prej tyre kanë dalë në anën perëndimore të kodrave , në Abrinë e Ulët ( që sot administrohet nga komuna e Skenderajit ) .

Abria ka qenë dikur si një fshat i tërë , por administrata jugosllavo – komuniste e ka copëtuar në dy fshatra , në dy komuna e madje edhe në dy regjione .

— Abria e Epërme dhe e Ulët , si dy fshatëra ;
— Abria e Epërme me komunën e Drenasit dhe Abria e Ulët me komunën e Skenderajit

Kështu , Abria e Epërme i përket regjionit të Prishtinës , ndërsa Abria e Ulët regjionit të Mitrovicës .

Edhe sot e kësaj dite , fshati Abri , që është njëri ndër dhjetë fshatrat më të mëdha në Kosovë është i ndarë kështu .

Pra , emri OBËR është nga paraardhësi ynë ( i abriasve ) , ndërsa shndërrimi i O – së në A është bërë qëllimshëm , sepse një herë është tentuar që Abria të merr toponimin ARBËRI – tash ABRI .

Rreth autorit: Hamdi Kurti është mësues në fshatin Abri, njëherit studiues i pasionuar i etimologjisë.